Эртең Түркмөнстанда дагы күндүн катуу ысый турганы айтылды

Эртең, 3-июнда Түркмөнстандын борбору Ашхабад шаарында күндүн катуу ысый турганы күтүлүүдө. Бул тууралуу аталган өлкөнүн "Ориент" аттуу басылмасы жазды.

Маалыматка ылайык, синоптиктер шаарда абанын температурасы +44, +47 градуска чейин көтөрүлүшү мүмкүн экенин айтышууда. Мындан улам, эртең кары-картаңдар, жаш балдар, ошондой эле жүрөк-кан тамыр оорулары менен жабыркагандарга күндүз көчөгө чыкпоо сунушталат.

Түркмөнстандын борборундагы эң ысык аба ырайы 2015-жылдын 30-июнунда катталган. Анда шаардагы термометрлер +47,2 градусту көрсөткөн.

Буга чейин, 3-июндан тартып коңшу Өзбекстанда дагы күн катуу ысый тургандыгы кабарланган.

Автор: Азат Бейшенбеков