"Акыл-эси жайында деген маалымкат алып берүүнү убада кылган". Бишкекте алдамчылыкка шектелип 59 жаштагы аял кармалды

Бишкекте алдамчылыкка шектелип 59 жаштагы аял кармалды. Бул тууралуу Октябрь РИИБинин маалымат кызматынан билдиришти.

Маалыматка ылайык, 17-май күнү Октябрь райондук милициясына шаар тургуну арыз менен кайрылган. Анда 2020-жылдын 9-декабрында ооруканалардын биринин кызматкери арыз ээсинин ишенимине кирип, акыл-эси жайында деген маалымкат алууга жардам берем деп 1 миң 500 доллар акчасын алып, бүгүнкү күнгө чейин убадасын аткарбай келгенин жазган.

Бул факты Кылмыштардын жана жоруктардын бирдиктүү реестрине 204-берене "алдамчылык" менен катталып, сотко чейинки өндүрүшкө алынган.

Иликтөө иш-чараларынын жүрүшүндө жогорудагы кылмыш ишине шектелип, 1962-жылы туулган аял кармалып, убактылуу кармоочу жайына киргизилген. Милициядан учурда шектүүнүн башка кылмыш иштерине тиешеси бар же жогу иликтенип жатканын кошумчалашты.

Автор: Гүлзина Каныбекова
Фото: Октябрь РИИБинин маалымат кызматы