Таласта 18 жаштагы кыздын өлүмү: Кылмышка катыштыгы бар деген шек менен кармалган бала үй камагына чыгарылды

Буга чейин Таласта 18 жаштагы кызды атып кетүүгө шектүү жигит асынып алган. Андан тышкары Кара-Буура РИИБинин тергөө бөлүмүнө 18 жаштагы Р.Н. аттуу бала алып келинген. Анын аталган кылмышка канчалык деңгээлде катыштыгы бар экендиги текшерилип жаткан болчу.

Ал 6-июнь күнү үй камагына чыгарылды. Бул тууралуу SUPER.KG порталына Талас облустук ички иштер башкармалыгынын маалымат кызматынан билдиришти.

"Кара-Буура райондук сотунун тергөө судьясы тарабынан анын баш коргоо чарасы каралып, кармалгандыгы мыйзамдуу жана негиздүү деп табылып үй камагына чыгарылды", - деп билдиришти облустук милициядан.

Маалымат үчүн:

Кыздын сөөгү 4-июнда токтоп турган унаанын ичинен табылган. Текшерүү учурунда ал ушул айылдын 2003-жылы туулган тургуну экени жана ок атуучу куралдан жаракат алганы аныкталган.

Көп өтпөй кыздын өлүмүнө шектелип жаткан Кара-Суу айылынын 19 жаштагы тургуну асынган абалда табылган болчу. Кылмышка катыштыгы бар деген шек менен 2003-жылы туулган Р.Н. аттуу дагы бир жаран Кара-Буура райондук ички иштер бөлүмүнө жеткирилген.

Бул факты Кылмыштардын жана жоруктардын бирдиктүү реестрине 130-берене "адам өлтүрүү" менен катталып, сотко чейинки өндүрүш иши башталган. Тиешелүү соттук-медициналык экспертизалар дайындалган.

Биздин портал киши колдуу каза болгон Нурайым Талипованын алдыга койгон максаттары, пландары тууралуу, ошондой эле асынып алган Талгат Анараалы уулу тууралуу жакындарынан бир катар суроолорго жооп алганбыз.

Автор: Гүлзина Каныбекова