УКМК: "Ошто тергөөчү пара алып жаткан жеринен кармалды"

Кечээ, 8-июнда Ош облусунун Кара-Суу РИИБинин тергөөчүсү Б.Г.И. 20 миң сом өлчөмүндө пара алып жаткан жеринен кармалды. Бул тууралуу УКМКнын басма сөз кызматынан билдиришти.

Маалыматка караганда, Кара-Суу райондук ички иштер бөлүмүнүн тергөө бөлүмүнүн тергөөчүсү, милициянын улук лейтенанты зордуктоого аракет кылуу фактысы боюнча сотко чейинки өндүрүштү кыскартуу үчүн А.М. аттуу жарандан 20 миң сом өлчөмүндөгү акча каражатын талап кылган.

Аталган факты Кылмыштардын жана жоруктардын бирдиктүү реестрине 326-беренеси "пара талап кылуу" менен катталып, сотко чейинки өндүрүш иши ачылган. Кармалган адам УКМКнын Ош облусу боюнча башкы башкармалыгынын тергөө камак жайына киргизилди. Учурда ыкчам-иликтөө иш-чаралары жүргүзүлүп жатат.

Автор: Гүлзина Каныбекова
Фото: УКМКнын маалымат кызматы