Ошто 26 жаштагы тургунду сабоого шектелип, уюшкан кылмыштуу топтун 3 мүчөсү кармалды

Ош облусунда 28 жаштагы кишини сабоого шектүү жарандар кармалды. Бул тууралуу ИИМдин маалымат кызматынан билдиришти.

Маалыматка ылайык, буга чейин Өзгөн районунда ур-токмокко тиешеси бар деген шек менен уюшкан кылмыштуу топтун 28 жана 34 жаштагы мүчөлөрү кармалган. Бүгүнкү күндө аталган кылмышка тиешеси бар үчүнчү жаран дагы кармалды. Ал 39 жаштагы уюшкан кылмыштуу топтун мүчөсү экени аныкталды.

"Алар буга чейин дагы мыйзамсыз иш-аракеттери үчүн кармалып, бирок камакка алуу менен байланышпаган алдын алуу чарасы колдонулган. Учурда шектүүлөр убактылуу кармоочу жайына камакка алынып, тергөө амалдары уланып жатат", - деп билдиришти ИИМдин маалымат кызматынан.

Белгилей кетсек, кармалган 3 жаран Ош облусунун тургунуна кол салып, сабап салышкан деп шектелүүдө.

Автор: Гүлзина Каныбекова
Фото: ИИМдин басма сөз кызматы