Баткенде социалдык тармактан экстремисттик уюмдарга кошулууга үгүттөгөнгө шектүү жаран аныкталды

Баткенде социалдык тармактардан экстремисттик уюмдарга чакырык жасап жүргөн жаран аныкталды. Бул тууралуу облустук милициядан кабарлашты.

Маалыматка караганда, Фейсбук социалдык тармагында өлкө аймагында ишмердүүлүгүнө тыюу салынган "Хизбут-Тахрир-аль-Ислами" экстремисттик уюмуна таандык маалыматтарды бөлүшүп жүргөн аккаунт аныкталган.

Бул факты Кылмыштардын жана жоруктардын бирдиктүү реестрине 315-берене "экстремисттик материалдарды даярдоо, таратуу" менен катталып, сотко чейинки өндүрүш иши ачылган.

"Иликтөө иштеринин натыйжасында, социалдык тармакта тыюу салынган маалыматтарды бөлүшүп жүргөн жарандын аты-жөнү аныкталып, Ош облусунун Ноокат районунун Жаңы-Ноокат айылынын 56 жаштагы тургуну экендиги белгилүү болгон.

15-июнь күнү шектүүнүн жашаган турак үйүнө тинтүү жүргүзүлүп, ишмердүүлүгүнө тыюу салынган "Хизбут-Тахрир-аль-Ислами" экстремисттик уюмуна таандык 5 даана китеп, 3 даана баракча жана диск, флешка, телефондор далил буюм катары алынды. Учурда алынган буюмдарга тиешелүү экспертиза дайындалып, тергөө иштери жүрүп жатат", - деп билдиришти Баткен ОИИБинин басма сөз кызматынан.

Автор: Гүлзина Каныбекова
Фото: Баткен ОИИБинин басма сөз кызматы