Кара-Балтада батирде эс-учу жок абалда табылган кызга куткаруучулар жардам көрсөтүштү

Чүй облусунда батирде 27 жаштагы Ж.А. аттуу жаран эс-учу жок абалда табылган. Бул тууралуу Өзгөчө кырдаалдар министрлигинин маалымат кызматынан билдиришти.

Ага ылайык, кечээ, 28-июнь күнү Жайыл районундагы куткаруучуларга Кара-Балта шаарынын Жаңы-Запад кварталында жайгашкан көп кабаттуу үйдүн батиринин эшиги бекилип калгандыгы жөнүндө маалымат келип түшкөн.

Айтылган дарекке барган куткаруучулар бекилип калган эшикти ачканда, батирдин ичинде 1994-жылы туулган кыз эс-учу жок абалда табылган.

Жерине ӨКБдан 3 куткаруучу тартылып, биринчи жардам көрсөткөндөн кийин кызды "Тез жардам" кызматкерлерине өткөрүп беришкен.

Автор: Гүлзина Каныбекова
Фото: Өзгөчө кырдаалдар министрлигинин маалымат кызматы