COVID-19 илдетине чалдыккан 17 жашка чейинки балдарды дарылоо үчүн 90 орун даярдалууда

Тектеш кабарлар: Дүйнөгө тараган коронавирус боюнча башка маалыматтар (8926 материал)

COVID-19 илдетине кабылган 17 жашка чейинки балдарды дарылоо үчүн 90 орун дайындалат. Саламаттыкты сактоо жана социалдык өнүктүрүү министрлигинин басма сөз кызматынан кабарлашкандай, балдар үчүн орундар Эне жана баланы коргоо улуттук борборунун экинчи базасында түзүлөт.

"29-июнда министр Алымкадыр Бейшеналиев Эне жана баланы коргоо улуттук борборунун 2-базасында болду. Министр коронавирус инфекциясынан жабыркаган 17 жашка чейинки балдарды кабыл алуу үчүн бүгүндөн баштап керебеттерди жайгаштырууну тапшырды. Учурда аталган борбордо 90 керебет даярдалууда.

Эми COVID-19 менен ооруган балдар аталган борбордо дарыланышат. Иштөө режими эпидемиологиялык кырдаал жакшырганга чейин уланат. Буга чейин COVID-19 менен ооруган балдар Республикалык клиникалык инфекциялык ооруканага жаткырылып келген.

Кардио-ревматология жана аллергология бөлүмдөрү Эне жана баланы коргоо улуттук борборунун биринчи базасына убактылуу өткөрүлүп берилгенин (Ахунбаев көчөсү 190) эсиңиздерге салабыз. Бейтаптарды ооруканага жаткырууда чектөө бар, "Тез жардам" менен келгендер гана ооруканага жаткырылат", - дешти мекемеден.