Нарында эки дос мас абалда уруша кетти. Ооруканага кайрылган жаран арыз жазуудан баш тартты

Социалдык тармактарда Нарын шаарында жаш балдар арасында массалык мушташ болду деген маалымат тастыкталган жок. Бул тууралуу Нарын ОИИБинин маалымат кызматынан кабарлашып, окуянын чоо-жайын билдиришти.

Анда 28-июнга караган түнү саат 00:10 чамасында Нарын шаарынын "Көлбай" дүкөндүн астында балдар мушташып жатат деген билдирүү келип түшкөн.

"Жерине ыкчам тергөө тобу барган учурда 25-30 жаш чамасындагы эки жаран бири-бири менен сөзмө-сөз урушуп, белгисиз автоунаага түшүп кеткендиги маалым болгон. Арадан көп убакыт өтпөй Нарын облустук бириктирилген оорукананын сынык-жаракат бөлүмүнө 1988-жылы туулган Нарын шаарынын тургуну Б.Р. кайрылганы, ал кызуу абалында экени аныкталган. Ал дүкөндүн жанында дос баласы менен уруша кеткенин айтып берген.

Укук коргоочулар окуяны толук кандуу териштирүү үчүн эртеси күнү Б.Р.нын үйүнө барган. Анда жаран ошол күнү дос баласы менен чогуу спирт ичимдигин ичкенин, окуя боюнча эч нерсе эсинде жок экенин жана эч ким уруп-сабабаганын, денесинен эч кандай оор жаракат албаганын билдирип түшүнүк берүүдөн жана арыз жазуудан баш тарткан. Бул тууралуу акт түзүлүп колдору коюлду", - деп кабарлашты мекемеден.

Автор: Бактыгүл Момбекова