Конор Макгрегордун сынган бутуна үч жарым саатка созулган операция жасалды

Ирландиялык ММА мушкери Конор Макгрегордун сынган бутуна 3 жарым сааттык операция жасалды. Бул тууралуу чет элдик басылмалар жазышты.

Маалыматка ылайык, Макгрегордун бут сөөгүнө интрамедуллярдык өзөк коюлган, буттун төмөн жагындагы узун ичке сөөгү бурамалар менен бекитилген.

Ал Лос-Анжелестеги Седарс-Синай ооруканасына жеткирилген. Дарыгерлердин айтымында, операция ийгиликтүү болгон. Макгрегор клиникада шаршемби күнгө чейин болору айтылууда.

Буга чейин, 11-июлда Лас-Вегас шаарында UFC 264 турнири өткөн. Мушташ техникалык нокаут менен аяктап, биринчи раунддан кийин Макгрегор бутунун сынганынан улам күрөштү уланта алган эмес.

Автор: Айзада Кыдырмышева