"Келин бычакталып өлтүрүлдү". Чүйдө аялын өлтүргөнгө шектүү жаран өз өмүрүн кыюуга аракет кылды

Чүй облусунун Аламүдүн районунда аялын бычактап өлтүргөнгө шектүү делинген 38 жаштагы киши өз өмүрүнө кол салганга аракет кылды. Маалыматты Чүй ОИИББинин маалымат кызматынан кабарлашты.

Белгилүү болгондой, бүгүн, 26-июлда саат 07:23 чамасында Ак-Жар айылында аял киши бычактан жаракат алгандыгы туурасында милицияга билдирүү түшкөн.

"Жерине барган ыкчам топ 1986-жылы туулган келиндин жансыз денесин аныкташты. Маркум киши колдуу каза болгону, алдын ала бычакталганы белгилүү болду. Ошондой эле келиндин жанында 1983-жылы туулган эркек кишинин жатканы аныкталды. Алдын ала маалымат боюнча, ал дагы бычактан жаракат алган. Ал ооруканага жеткирилди.

Бул факты Кылмыштардын жана жоруктардын бирдиктүү реестрине 130-берене менен катталып, тиешелүү экспертизалар дайындалды. Алдын ала маалымат боюнча, күйөөсү жубайын өлтүрүп, андан соң өз жанын кыюуга аракет кылгандыгы белгилүү болду", - дешти мекемеден.

Автор: Бактыгүл Момбекова