Австралияда Олимпиада оюндарынын жеңүүчүсү 25 жылга эркинен ажыратылды

Австралияда кайык жарышы спорту боюнча Олимпиадалык оюндардын эки жолку күмүш медалынын жеңүүчүсү Натан Баггали баңгизатты аткезчилик жол менен ташууга айыпталып, 25 жылга эркинен ажыратылды. Бул тууралуу чет элдик басылмалар жазышты.

Маалыматка ылайык, Брисбендеги соттун чечими менен ушундай эле мөөнөткө эркинен ажыратуу өкүмүн спортчунун бир тууган иниси да алды. Бир туугандар чет элдик кеме аркылуу 650 килограмм кокаинди аткезчилик жол менен ташууга аракет кылышкан. Бирок Австралиянын аскер-деңиз флотунун кайгуул кызматы тарабынан колго түшүрүлүп, полиция кызматына өткөрүлүп берилген.

Ал эми 45 жаштагы австралиялык спортчунун адвокаты бир туугандардын баңгизат ташып бара жатканынан кабары болбогондугун айтып чыккан. Анын айтымында, спортчу кемедеги таңгактарда тамеки гана бар деп ойлогон.

Бирок сот бир туугандардын буга чейин дагы аткезчилик иштерине активдүү катышып келишкенин билдирди.

Белгилей кетсек, Натан Баггали былтыркы жылдын май айында дагы кокаин менен кармалган. Сот аны апрель айында кылмышка айыптуу деп тапкан. Ошондой эле бир туугандар 2009-жылы Экстази дарысын мыйзамсыз түрдө жасашкандыгы үчүн камакка алынып, абакта жазасын өтөп чыгышкан. 2015-жылы дагы кайрадан баңгизат кылмышы менен кармалып соттолушкан.

Автор: Жанбулат Жумабеков