Улукбек Мариповдун Талас облусуна болгон иш сапары жыйынтыкталды

Улукбек Мариповдун Талас облусуна болгон иш сапары жыйынтыкталды. Бул тууралуу министрлер кабинетинин маалымат кызматынан кабарлашты.

Иш сапардын жүрүшүндө Улукбек Марипов Бишкек-Ош унаа жолундагы реконструкциялоо ишин, Өтмөк ашуусундагы Суусамыр-Талас-Тараз жолунун абалын текшерип, Жер-Үй кениндеги Талас алтын комбинатынын иши менен таанышты. Ошондой эле жарандардын арыздары боюнча Көк-Кашат айылындагы Атай Огонбаев атындагы мектептин абалын текшерди, Шекер айылындагы "Чыңгыз-Ордо" тарыхый-маданий комплексинин курулушунун жүрүшү менен таанышты.

Мындан тышкары, жакында сел жүргөн Кара-Буура районуна барды.

Сапардын жыйынтыгында бир катар тапшырмалар берилип, тиешелүү чечимдер кабыл алынды. Тактап айтканда, жамап-түзөө иштеринен баш тартып, Төө-Ашуунун түштүк тарабындагы 6 чакырым унаа жолуна эки катмар асфальт төшөө менен капиталдык ремонттон өткөрүү, Кара-Буура – Чаткал жол тилкесин грейдер менен тазалап, жолду ачуу тапшырылды. Кара-Буура районундагы селдин кесепетинен жабыркаган көпүрөнү эки жуманын ичинде калыбына келтирүү милдети коюлду. Мындан тышкары, министрлер кабинети келерки жылы Шекер айылындагы "Чынгыз-Ордо" тарыхый-маданий комплексинин курулушунун биринчи этабын жыйынтыктоо үчүн калган сумманы бөлүп берет.

Автор: Айжанар Рыспек кызы