Чүйдө май куюучу жайдын жанында турган жүк ташуучу унаадан өрт чыгып, май куюучу жай кошо өрттөндү

Чүй облусунда май куюучу жай күйүп кетти. Бул тууралуу Өзгөчө кырдаалдар министрлигинин маалымат кызматынан билдиришти.

Ага ылайык, өрт кырсыгы 3-августка караган түнү болгон.

"Кемин районундагы жолдун жээгинде "Red Petroleum" май куюучу жайында турган жүк ташуучу Мерседес-Бенц унаасынан өрт чыгып, толук күйүп кеткен. Андан чыккан өрт 1 даана май куюучу колонкасына өтүп оператордук бөлмөнү жана ичинде жайгашкан дүкөндү (жалпы аянты 80 чарчы метр), темир калай менен жабылган бастырманы (140 чарчы метр) каптап кеткен", - деп билдиришти ӨКМнын маалымат кызматынан.

Өрттүн кесепетинен болжол менен 220 чарчы метр аянт күйдү. Өрт саат 23:40та чектөөгө алынып, 04:36да толук өчүрүлгөн. Жабыркагандар жок. Өрттүн келип чыгуу себеби такталууда.

Автор: Гүлзина Каныбекова
Фото: Өзгөчө кырдаалдар министрлигинин маалымат кызматы