Калифорниядагы өрт 150 жылдык тарыхы бар шаарды жок кылды

АКШнын Калифорния штатындагы токойдон чыккан өрт кырсыгы 150 жылдык тарыхы бар Гринвил шаарын кыйратты. Бул тууралуу чет элдик басылмалар кабарлашты.

"Дикси" аталышындагы тилсиз жоо Гринвил шаарына бейшемби күнү кечинде жеткен. Шаар эки сааттын ичинде жок болду. Биз шаардагы жарылуулардан чыккан үндөрдү угуп турууга гана мажбур болдук", - деп билдирген жергиликтүү тургундардын бири.

Маалыматка ылайык, катуу шамалдын таасири менен Гринвил шаарын каптаган өрттүн кесепетинен шаардагы жүздөгөн үйлөр, ресторан, ишканалар, бензин куюучу жай, мейманкана жана музей толугу менен күйүп кеткен.

Белгилей кетсек, АКШнын Калифорния штатындагы өрт 13-июлда башталган. Андан бери 3 апта өтсө да тилсиз жоо бир катар аймактарда дагы эле жайылууда. Бүгүнкү күнгө чейин 112 миң 500 ашык гектар аянтты камтып, анын 35 пайызын өчүрүүгө жетишишкен. Ал эми өрт катталган аймактардан жалпы 16 миңден ашуун тургун коопсуз жайга көчүрүлгөн.

Автор: Жанбулат Жумабеков