"35 тонна күйүүчү май болгон". Жалал-Абадда бензовоз оодарылып кетип айдоочусу каза болду

Жалал-Абад облусунда күйүүчү май ташуучу унаа кырсыкка учурап, бир адам каза болду.

Өзгөчө кырдаалдар министрлигинин маалымат кызматынан билдиришкендей, кырсык Бишкек-Ош унаа жолунда катталган. Анда Freightliner үлгүсүндөгү күйүүчү май ташыган бензовоз унаасынын айдоочусу рулга ээ боло албай калып, жолдон чыгып сайга кулап түшкөн.

"Кырсыктын кесепетинен 60 жаштагы Б.Ж. аттуу айдоочусу каза болуп, 39 жаштагы жүргүнчүсү жабыркаган. Унаада 35 тонна күйүүчү май (солярка) болгон, төгүлгөн күйүүчү май Кара-Суу дарыясы аркылуу Нарын дарыясына кошулган.

Ал эми каза болгон адамдын сөөгү жана жабыркаган адам "Тез жардам" кызматы аркылуу Кара-Көл шаардык ооруканасына жеткирилген. Жерине Кара-Көл шаардык ӨКБдан 5 куткаруучу тартылып тактоо иштерин жүргүзүшкөн", - деп билдиришти ӨКМнын маалымат кызматынан.

Мындан сырткары ИИМдин кызматкерлери жана экологиялык жана техникалык коопсуздук боюнча мамлекеттик инспекция кызматкерлери тарабынан тиешелүү иш-чаралары жүргүзүлүп жатканын кошумчалашты.