Жалал-Абадда мал багылган сарайдагы өрт түндө өчүрүлдү

11-августта Жалал-Абад шаарында мал сарайдан өрт чыккан. Өрттү өчүрүү 12-августка караган түнү толук өчүрүлгөнүн ӨКМнын маалымат кызматынан кабарлашты.

"Жалал-Абад шаарынын Көк-Арт кичи районундагы тунуке менен жабылган эки кабаттуу сарайдын 2 миң 320 чарчы метр аянты, 2000 түк чөп жана 6000 түк саман күйдү. Өрттү өчүрүүгө жалпы 5 өрт өчүрүүчү бөлүм тартылып, саат 12:19да өрт чектөөгө алынып, саат 00:08де толугу менен өчүрүлгөн. Өрттүн кесепетинен жабыркагандар болгон жок.

Учурда материалдык чыгым жана өрттүн себеби такталууда", - дешти мекемеден.

Буга чейин жергиликтүү тургундардын бири сарайда болжол менен 400дөй уй багылып жатканын, сарайдын үстүндө жыйылган чөп бар экенин порталыбызга кабарлаган.

Автор: Бактыгүл Момбекова
Фото: ӨКМнын басма сөз кызматы