Тажикстан Ооганстандын президенти Дүйшөмбүгө келбегенин билдирди

Тажик бийлиги Ооганстандын президенти Ашраф Ганинин Дүйшөмбүгө келиши жөнүндөгү маалыматты четке какты. Бул тууралуу Тажикстандын Тышкы иштер министрлигинин маалымат кызматына таянуу менен жергиликтүү басылмалар жазышууда.

"Тажикстан Республикасынын Тышкы иштер министрлиги Мухаммед Ашраф Гани мырза менен болгон учак Тажикстандын аба мейкиндигине кирбегенин жана өлкөнүн аймагына конбогонун билдирет. Ошондой эле тажик тарапка ооган тараптан тиешелүү суроо-талап түшпөгөнүн белгилей кетүү керек", - деп жазылат маалыматта.

15-августта түштөн кийин талиб согушкерлери Кабулга киргенден кийин президент Ашраф Ганинин Ооганстандан качып кеткени тууралуу кабар түшкөн. Ал убактылуу башпаанек таба алган өлкөлөрдүн арасында Тажикстан да болгон.

Автор: Ырыскелди Салбаров