Бишкекке түркиялык өндүрүштөгү көп орундуу автобустар келет. Бул тууралуу Бишкек шаардык мэриясынын басма сөз кызматынан кабарлашат.
Маалым болгондой, шаардык транспорт башкармалыгы "Грин Бас" жоопкерчилиги чектелген коом менен меморандумга кол койду. Ага ылайык, 2021-2022-жылдар аралыгында Бишкек шаарына 300-350 автобусту жеткирүү мерчемделүүдө.
"10-12 метрлик экологиялык таза жайлуу автобустардын биринчи партиясы ноябрдын аягына чейин борбор калаага жеткирилет. Автобустар ден соолугунун мүмкүнчүлүгү чектелген жүргүнчүлөрдүн ыңгайлуулугуна жана эл аралык стандарттарга, талаптарга толук жооп берет", - деп айтылат билдирүүдө.