Ооганстандын президенти каякта баш калкалап жатканы белгилүү болду

Ооганстандын президенти Ашраф Гани каякта экени белгилүү болду. Бул тууралуу чет элдик басылмалар жазып чыгышты.

Маалыматка ылайык, Ооганстандын президенти Ашраф Гани үй-бүлөсү менен кошо Бириккен Араб Эмираттарында баш калкалоодо. Бириккен Араб Эмираттарынын Тышкы иштер министрлигинин сайтында маалымдалгандай, Ооганстандын башчысы жана анын үй-бүлөсү аталган өлкөдө "гуманитардык себептер менен" кабыл алынды.

Айта кетсек, Ооганстанды 2014-жылдан бери жетектеп келген Ашраф Гани 15-август күнү түштөн кийин "Талибан" кыймылы Кабулга киргенде өлкөдөн чыгып кеткен.

Алгач маалымат каражаттары Гани Тажикстанга, Өзбекстанга же Оманга кеткенин жазып чыгышкан.

"Ошондой эле Ашраф Гани чоң суммадагы накталай акчаны өзү менен кошо алып кеткени тууралуу да маалыматтар айтылууда. Төрт машина акчага толгон, алар акчанын калган бөлүгүн тик учакка салууга аракет кылышкан, бирок баарын алып кетүүгө ыңгайы келбей акчанын бир бөлүгү учуу талаасында калып калган", - деп жазылат маалыматта.

Автор: Алина Айдарбекова