Ажолордун сүрөтүн тарткан Таалайбек Усубалиев: "Сүрөттү сатып алам дегендер чыгып жатат"

24-августта Гапар Айтиев атындагы Кыргыз улуттук көркөм өнөр музейинде Кыргыз Республикасынын Эгемендүүлүгүнүн 30 жылдыгына карата "Жаңы Соцреализм-2" көргөзмөсү ачылды. Сүрөтчү Таалайбек Усубалиев социалдык тармактарда кызуу талкуу жараткан "Ата Бейит" сүрөтү боюнча SUPER.KG порталына өз оюн билдирди.

Анын айтымында, сүрөттү коомчулук туура эмес кабыл алган, ал болгону өлкө башчыларын биримдикке чакыргысы келген.

“Бул сүрөттү тартууга өлкө тарыхындагы революциялар түрткү берди. Азыр көбү Кыргыз мамлекетинин биримдиги бузулуп, чачырап кетсе экен дегендер. Ошол себептүү мен өлкө келечеги үчүн бардык саясий күчтөрдү ынтымакка чакыруу максатында бул сүрөттү тарткам", - деди.

Ал сүрөттү жаратууда кыйынчылыктар болгонун айтат.

"Сүрөттү тартуу үчүн көп изденүүгө туура келди. Президенттердин боюнан тарта кийим, галстугуна чейин окшоштурууга болгон аракетимди жумшадым".

Айтмакчы, сүрөттүн аркасындагы булуттун чагылдырылышынан өлкөнүн картасын көрүүгө болот. Сүрөтчү муну менен өлкө экономикасынын көтөрүлүшүн каалагандыгын айтты.

"Сүрөткө чет мамлекеттин кызыккан жарандары бар. Орто Азияда ушундай картиналар тартыларына таң калгандар да жок эмес. Казакстан, Өзбекстандагы кесиптештерим: “Таалай, биз мындай сүрөттөрдү тарта албайбыз. Тарткан күндө да бизге уруксат жок. А силерде чын эле демократия бар экен” деп чалып жатышат. Ал эми сүрөттү сатып алам дегендер да болуп жатат. Бирок мен Кыргыз жергесинде эле калса экен деп тилейм”, - деп кошумчалады.

Ошондой эле Бишкек шаарынын тургуну Асанбердиев Назил сүрөт боюнча төмөндөгүдөй пикир калтырды:

"Мен бул сүрөттөн ажолорубуздун үстүндөгү сур булуттарды байкадым. Анда көрүнгөндөй, ар бир президенттин үстүндөгү сур булут өзүнчө маанини камтыйт. Ошондой эле мурунку президент Курманбек Бакиевдин галстугунун кызыл өңдө болушу, ошол убактагы канчалаган жаш жигиттерибиздин өлүмү, каны менен байланыштуу болгондугунан кабар берет. Мындан тышкары өлкөбүздүн буга чейинки беш президенти жерди карап, элдин астында уялышууда. Азыркы учурдагы ажобуз Садыр Жапаров элди карап турат. Эл менен иштешип, мамлекетибизди өнүктүрөт деп терең ишенем. Бул сүрөттүн мындан аркы уландысын да көргүбүз келет", - деген пикирин айтты.

Сүрөтчү ага улай эле "Токио-2020" Олимпиада оюнуна карата тартылган сүрөт боюнча мындай деди:

"Сүрөт толугу менен бүтпөй калды. Сүрөттүн эки жагына Акжол Махмудов менен Мээрим Жуманазарованы кошоюн дегем. Бирок жетише албай калдым. Буюрса, толук сүрөттү кийинки көргөзмөгө коём. Эл аянтка чыгып, баатырларыбызга күч-кубат бергенин тарткан сүрөтүм аркылуу чагылдыра алдым деп ойлойм".

Эскерте кетсек, маалымат булактары Таалайбек Усубалиевдин бул сүрөтү көргөзмөдөн алынарын жазып чыгышкан. Ал эми сүрөтчү маданият, маалымат, спорт жана жаштар саясаты министри Кайрат Иманалиев менен жолукканын айтып, эч кандай кысым көрсөтүлбөгөнүн белгиледи.

Белгилей кетсек, сүрөттү тартууга бир жылдык эмгек кеткен.