Ош шаарында телефон уурдаганга шектелип 3 жаран кармалды

Ош шаарында телефон уурдаганга шектелип 3 жаран кармалды. Бул тууралуу Ош ШИИБинин басма сөз кызматынан билдиришти.

Ош шаардык ички иштер башкармалыгынын Сулайман-Тоо милиция бөлүмүнө Ош шаарынын 1995-жылы туулган жашоочусу 16-июль күнү арыз менен кайрылган.

Арызда аны Ош шаарынын Ленин көчөсүндө түн ичинде бара жатканда белгисиз үч жигит коркутуп, Айфон үлгүсүндөгү телефонун алып койгондугун билдирген. Сулайман-Тоо милиция бөлүмүнүн кызматкерлери тарабынан бул кылмышка шектүү үч жарандын аты-жөнү аныкталып, издөө иштери башталган.

Натыйжада 31-август күнү 1997-жылы туулган Ж.А., 1994-жылы туулган А.уулу А., жана 1998-жылы туулган А.у.М. Кара-Кулжа районунан кармалып, убактылуу кармоочу жайга киргизилген. Бүгүн, 2-сентябрда алардын баш коргоо чарасы каралат.

Тоноо фактысы боюнча тергөө иштери уланууда. Учурда бул кылмыштуу топтун ушул сыяктуу тоноо иштеринде катыштыгы бар же жок экендиги иликтенүүдө.

Автор: Айсалкын Качкынбекова