4-күн. Манасчы Дөөлөт Сыдыковдун абалы айтылды

31-августта Манасчы Дөөлөт Сыдыков Орусиянын Москва шаарында 5 күн, 5 түн бою улуу баян айтууну баштаган. Бүгүн 4-күн. Манасчыга интернет желеси аркылуу баам салып турган күйөрмандар анын ден соолугуна кабатыр болуп, түрдүү пикирлерди жазышууда. SUPER.KG порталы манасчынын саламаттыгынан жана иштин жүрүшүнөн кабар алуу үчүн Гиннесске каттоо боюнча иштерди уюштурууну жетектеген Гүлзар Кокенова менен байланышты.

"Азыркы тапта көптөгөн мекендештерибиз манасчы Дөөлөт Сыдыковдун ден соолугуна кабатыр болушууда. Арасында бизди тилдеп жаткандары да бар. Уюштуруучулар тобу да жөнөкөй эл менен бирге манасчы үчүн күйүп-бышып жатабыз. Биринчиден, манасчынын ден соолугу жакшы. Өзүн жакшы сезип жатат. Бизде манасчынын ден соолугуна күнү-түнү баам сала турган медицина кызматкерлери бар. Бирок азырынча Дөөлөт Сыдыков алардын жардамына муктаж эмес. Экинчиден, айрымдар "эмне себептен эс алдырбай манас айттырып кыйнап жатасыңар" деген суроону узатышууда. Биз Гиннесске кирүү үчүн атайын түзүлгөн план менен иш алып барып жатабыз. Ал жерде качан туруп, качан эс алары жазылган. Мисалы, орто жолдо 15 мүнөт тыныгуу деген сыяктуу. Манасчы улам тына бербестен, ошол убакыттын баарын бириктирип, бир эс алып жатат. Курсагы ток. Керек болсо манас айтуу учурунда суу ичүү да каралган. Бирок манасчы улам дааратканага бара берүүдөн кооптонуп, суудан өзү баш тартты. Үчүнчүдөн, ал транска кирген же башка учурда аны себепсиз токтотпоону өтүндү. Ал өзүн колго алып, качан манас айтууну токтото турганын өзү билет. Мисалы, Кыргызстанда манас айтып жаткан учурда 14 сааттан ашкандан кийин аны токтотуп койгондо "дагы айтмакмын" деп капа болгон. Бул жагдайды да эске алдык. Негизгиси койгон максатына жетүү үчүн өзү абдан катуу аракет кылып жатат. Элде "эмне себептен Москвага барып манас айтып жатат?" деген суроо болушу мүмкүн. Бизге жеке эле Кыргызстандын эмес, дүйнөдөгү башка элдердин көңүлүн өзүбүзгө буруу керек болду. Бул тууралуу дүйнөдөгү ЖМКлар жазып чыгышы керек. Албетте, чет элдик өкүлдөр да бул тарыхый окуяга күбө болушу зарыл. Бул уюм тараптан коюлган атайын талаптар. Талаптарды так аткарышыбыз кажет. Манас айтууга В.Ломоносов атындагы Москва мамлекеттик университетинин профессору Марклен Конурбаев, филология илимдеринин доктору, манас таануучу, профессор Жылдыз Орозобекова жана башка өкүлдөр күбө болушууда. Колдоп келген мекендештерибиздин аягы суюлбайт. Гиннесске каттоо боюнча документтерди топтогондо официалдуу өкүлдөрдүн көрсөтмөлөрү тиркелет. Убакытты тескеген атайын секундамер, манас айтуу процессин видеокамерага тарткан аппараттар манасчы эс алган учурда да өчүрүлбөй иштеп жатат. Булардын баары документке тиркелет. Манас айтылып бүткөн соң бир айдын ичинде документтерди Гиннесске жөнөтөбүз. Алар дагы шарт боюнча бул ишти 3 айдын ичинде карашат", - деп билдирди уюштуруучулардын бири Гүлзар Кокенова.