Бириккен Араб Эмираттары Кыргыз өлкөсүнө күн электр станциясы үчүн инвестиция салууга кызыкдар

Бириккен Араб Эмираттарынын компаниясы Кыргыз өлкөсүнө күн электр станциясы үчүн инвестиция салууга кызыкдар. Бул тууралуу Энергетика жана өнөр жай министрлигинен билдиришти.

Маалыматка ылайык, Энергетика жана өнөр жай министрлигинин, энергокомпаниялардын өкүлдөрү Бириккен Араб Эмираттарынан (БАЭ) келген делегация менен жолугушту. Анда энергетика тармагында кызматташуу маселеси талкууланды. Ошондой эле кыргыз тарап өлкөдөгү энергетикалык долбоорлор боюнча маалымат беришти.

"Сүйлөшүүнүн жүрүшүндө БАЭ тарап энергиянын кайра жаралуучу булактары боюнча Кыргыз өлкөсүнүн дарамети жогору экенин айтышты. Ал эми «MASDAR» компаниясы күн электр станциясына инвестиция салууга кызыкдар экенин белгилешти.

Белгилей кетсек, бул компания Өзбекстанда күндүн нуру менен иштеген электрстанциясына 110 миллион доллар инвестиция салган", - деп жазылат маалыматта.

Жолугушуунун соңунда эки өлкөнүн Энергетика министрликтеринин ортосунда кызматташуу боюнча меморандумга кол коюу сунушу киргизилди. Эми тараптар документтин долбоорун даярдоо боюнча иш жүргүзөт.

Автор: Айжанар Рыспек кызы
Фото: Энергетика жана өнөр жай министрлигинин басма сөз кызматы