Кара-Кулжада өрт өчүрүүчүлөр күйүп жаткан үйдөн 2 баланы алып чыгып, куткарып калышты

ӨКМнын Ош облусунун Кара-Кулжа районундагы өрткө каршы кызматынын кызматкерлери кечээ, 4-ноябрда Кара-Кулжа районунун Кара-Кулжа айылында өрттөнүп жаткан үйдөн 2 баланы алып чыгып, куткарып калышты. Бул тууралуу ӨКМнүн басма сөз кызматы бүгүн, 5-ноябрда билдирди.

Маалыматка караганда кечээ, 4-ноябрда саат 20:44тө аталган райондун өрткө каршы кызматына Кара-Кулжа айылындагы бир үй күйүп жатканы боюнча кабар түшкөн. Өрт өчүрүүчүлөр аталган дарекке саат 20:48де жетип, өрттөнүп жаткан үйдөн 4 жаштагы Касым кызы Аймира менен 1 жаштагы Касым уулу Бексултанды алып чыгышкан. Өрт учурунда үйдүн кожойкеси жок болгон. Өрт үйдөгү мешти жана морду туура эмес орнотуудан келип чыккан. Натыйжада үйдүн шыбынын 14 чарчы метри өрттөнгөн.

Автор: Канымжан Усупбекова