Кеминде жаранды сүзүп, окуя болгон жерден качып кеткен айдоочу кармалды

Чүйдүн Кемин районунда жаранды сүзүп, окуя болгон жерден качып кеткен айдоочу кармалды. Бул тууралуу Чүй облустук жол кыймылынын коопсуздугун камсыздоо башкармалыгынан билдиришти.

Маалыматка ылайык, 16-сентябрь күнү саат 20:30 чамасында Бишкек-Нарын-Торугарт унаа жолунда Дэу-Матиз унаасы 1957-жылы туулган жаранды жөө адамдар өтүүчү өтмөктөн сүзүп, андан ары из жашырган.

Жабырлануучу жеңил жаракаттарды алган. Ошол замат Кемин райондук жол кыймылынын коопсуздугун камсыздоо бөлүмү айдоочуну кармашкан. Ал 1985-жылы туулган айдоочу болгон. Унаа айып короо жайына токтотулуп, учурда териштирүү иштери жүрүүдө.

Автор: Айсалкын Качкынбекова