Япониядагы 107 жаштагы эже-сиңди дүйнөдөгү эң кары эгиздер деп табылды

Япониядагы 107 жашка чыккан эже-сиңди дүйнөдө жашап жаткан эң кары эгиздер деп табылды. Бул тууралуу чет элдик басылмалар жазып чыгышты.

Маалыматка ылайык, япониялык эгиздер Умено Сумияма жана Коуме Кодама учурда 107 жашта. Ушул жылдын 1-сентябрына карата эже-сиңдилер дүйнөдө жашап жаткан эң улгайган (107 жыл 300 күн) эгиздер деп табылып, "Гиннесстин рекорддор китебине" катталган.

Бир туугандар 1913-жылы 5-ноябрда Япониянын Седо аралында 13 балалуу чоң үй-бүлөдө жарык дүйнөгө келишкен. Алар 2 дүйнөлүк согушту башынан өткөрүшкөн.

Эң кызыгы, алар балалыгынан бери өз-өзүнчө жашашкан жана азыр дагы чогуу жашашпайт. Бирок бири-бирин ар дайым колдоп турушарын айтышкан.

"Гиннесстин рекорддор китебинин" адистери карантиндик чектөөлөрдөн улам эгиз бир туугандарга бара алышкан эмес. Бирок аларга рекорддор китебине катталгандыгы тууралуу сертфикатын берип жиберишкен.

Эске салсак, Япония өлкөсү буга чейин улгайган адамдардын саны боюнча дүйнөлүк рекорд койгон. Аталган өлкөдөгү 65 жаштан жогорку адамдардын саны дүйнө жүзү боюнча рекорддук көрсөткүчтү, тагыраагы 36 миллион 400 миң адамды түзгөн.

Автор: Жанбулат Жумабеков