Нарында токтоп турган унаа толук күйүп кетти. Өрт ширетүү иштериндеги коопсуздуктун сакталбаганынан келип чыккан

Нарында ширетүү иштериндеги коопсуздук эрежелери сакталбай, өрт чыкты. Анын кесепетинен унаа толук күйүп кетти. Маалыматты ӨКМнын басма сөз кызматынан кабарлашат.

Белгилүү болгондой, 21-сентябрда Кара-Ой айылында көчөдө токтоп турган унаадан өрт чыккан. Өрттү өчүрүүгө бир бөлүм тартылып, саат 17:00дө өрт чектөөгө алынып, саат 17:08де толук өчүрүлдү.

"Өрттүн кесепетинен Хонда Степвагон үлгүсүндөгү унаа толук күйүп, жакын жайгашкан бак дагы күйүп кетти. Өрт электр ширетүү иштеринде өрт коопсуздук эрежелеринин бузулушунан келип чыккан", - дешти мекемеден.

Автор: Бактыгүл Момбекова
Фото: ӨКМнын басма сөз кызматы