Жалпы 831 даана тор. Балык чарба департаменти өлкөдөгү көлдөрдөн мыйзамсыз салынган торлорду жыйнады

Айыл, суу чарба жана аймактарды өнүктүрүү министрлигинин Балык чарба департаментинин кызматкерлери суу сактагычтарды жана көлдөрдү тазалоо, балыктарды коргоо максатында Ысык-Көлдө, Орто-Токой, Токтогул жана Чүй облусуна караштуу бардык суу сактагычтарда тазалоо иштерин жүргүзүп бүттү. Бул тууралуу аталган министрликтин маалымат кызматынан билдиришти.

Анда айтылгандай, 6 айдагы тазалоо иштеринин натыйжасында жалпы узундугу 71 миң 980 метрди түзгөн 831 даана мыйзамсыз салынган балык кармоочу торлор табылган.

Алардын ичинен:

Ысык-Көлдө 488 даана (жалпы узундугу 39 миң 40 метр);

Орто-Токой суу сактагычында 20 даана (2 миң метр);

Токтогул суу сактагычында 170 даана (17 миң метр);

Чүй облусундагы суу сактагычтарда 153 даана (13 миң 190 метр).

Ошондой эле браконьерлер тарабынан мыйзамсыз салынган балык уулоочу тордун бардыгы суудан чыгарылып, тазаланганы кабарланды.