"Электр жарыгы өчүп калды, бирок эл өзү жарык кылып турду". Сейил бакта өзгөчө атмосферадагы иш-чара болуп өттү (сүрөт, видео)

Бүгүн, 25-сентябрда Бишкек шаарындагы "Ынтымак 2" сейил багында "Бир адамдан бир китеп" долбоорунун алкагында "Китепкөй Кыргызстан" аталышындагы интеллектуалдык маданий иш-чара болуп өттү.

Иш-чарага экс-министр, коомдук жана мамлекеттик ишмер Нуржигит Кадырбеков, акын Акбар Кубанычбеков, ырчылар Азиз Батыров жана Нурчолпон, жаш талант Акмарал Эркинбек кызы катышты.

"Мындай адамдар бар үчүн рух тирүү, билим тирүү. Кыргыз мамлекети дүйнөдөгү эң окурман өлкө болмоюнча, мындай иштер улантылат". Мындай пикирин экс-министр Нуржигит Кадырбеков билдирди.

"Биз тилек кылдык эле, пикет үчүн эмес, китеп үчүн эл топтолсо экен деп. Ошол күн жакындап келе жатат. Бул жөн эле нерсе эмес, бул ыктыярчылардын, "Бир адамдан бир китеп" долбоорундагы уул-кыздардын эмгегинин акыбети" - деди ал.

Айтмакчы, ар иштин жакшы жагы менен биргеликте кемчилиги болот эмеспи. Аны сыңарындай саамалыктын жүрүшүндөгү жарыктын өчүрүлүшү боюнча жогоруда аталган коомдук ишмер өз пикирин айта кетти.

"Иш-чарада күтүлбөгөн нерселер болду. Жарык жанбай калды, бирок эл өзү жарык кылып турду. Чынында рухтун, акылдын жарыгы башкача болот. Эгер митинг, саясий иш-чара болсо, мындан сонундар табылмак. Бизде каражат жана энергияны туура эмес жакка коротуп аткандай эле боло беребиз. Туура эмес жакка баары табылат, а туура жакка келгенде эле ушундай кыйын болот экен. Бирок жокчулуктун балдары, токчулуктун балдарына караганда тың чыгат деген сөз бар го. Ошондуктан мындай кырдаалга карабай, өз иштерин так аткарган уул-кыздардын эмгегинин жыйынтыгы чоң, жаркын келечекке алып барат деп ишенем" - дейт ал.

Ал эми акын Акбар Кубанычбеков төмөнкүлөргө токтолду: "Бир апта мурда сейил бактын бош турганын көрүп, ушул жакка сонун кечелер өткөрүлсө деп кыялданып койгом. Кудай жалгап, бүгүнкү иш-чарада ыр окуп, өз кызматыбызды кылып жатканыбызга кубанычтамын".

"Бактар саргайып, жамгыр жаабаган сыяктуу эле, адамдар да кадимкидей руханий, интеллектуалдык жактан суусап калды деп ушул иш-чараны уюштурдук. Биз акындар, коомго белгилүү инсандар менен жаштарды, элдерди жолуктуруп, алардын ортосуна бирдиктүү аянтча түзүп берсек экен деп ниет кылганбыз. Ал эми электр жарыгынын күйбөй калгандыгы боюнча тиешелүү администрацияга кайрылдык. Алар бири-бирине шылтап, маселе оң жагына чечилген жок. А бирок иш-чара бүтүп, эл тарагандан кийин сейил бакта жарык күйүп, адаттагыдай эле көңүл ачуучу иш-чаралар болгондугу айтылып жатат. Ошентсе да бүгүнкү иш чара өз максатына жетти деп ойлойм" - дейт долбоордун негиздөөчүлөрү Бакай Акылбеков менен Эрлан Смайыл уулу.

Буга улай эле аталган долбоордун жалпы жамааты SUPER.KG порталына ыраазычылык билдирип кетишти. Ал эми келген коноктор иш-чара жогорку деңгээлде өтүп, "баш" жана "төш" казанды толтуруп кетишкендерин айтышты.

Аталган саамалык китеп сүйүүчүлөрдүн катышуусунда бүйүр кызыткан программалар менен өттү. Ошондой эле иш-чаранын алкагында акындардын ыр айтуусу, беделдүү инсандардын насаат сөздөрү айтылды. Иш-чара дээрлик үч саатка созулду. Келген коноктордун көпчүлүгү окуучулар жана студенттер болду.