Бишкекте баңгизатын таратууга шектелген эки жаран 2 айга камакка алынды

Баңгизатты мыйзамсыз таратууга шектелип эки жаран кармалды. Бул тууралуу Аламүдүн РИИБинин басма сөз кызматынан билдиришти.

Маалыматка ылайык, 4-сентябрда атайын иликтөө иш-чаралары жана ыкчам издөө иш-чараларынын жүрүшүндө, Бишкек шаарынын аймагында интернет дүкөндөрдүн биринен баңгизаттын кезектеги партиясын алып жаткан учурда 1998-жылы туулган С.А. кармалды. Мындан ары атайын тергөө аракеттерин жана ыкчам издөө иш-чараларын жүргүзүү учурунда ошол эле күнү саат 15:00 чамасында Бишкектеги соода борборлорунун биринин жанында кылмышка дагы бир шектүү 1999-жылы туулган Э.А. аттуу жаран кармалды. Алар баңгизаттарды сактаган жайларын көрсөтүп, кылмышты моюнга алышкан.

Бул факты 267-берене (баңгизаттарды, психотроптук заттарды мыйзамсыз даярдоо) менен Кылмыштардын жана жоруктардын бирдиктүү реестрине катталган. Аламүдүн райондук сотунун чечими менен шектүүлөр эки айга камакка алынды.

Автор: Жолдубек Качкынбаев