Казакстанда таксист 1 жарым миллион теңгесин унутуп кеткен аялдын акчасын кайтарып берди

Алматылык 23 жаштагы таксист 1 миллион 500 миң теңге жана алтын буюмдарын таксиде унутуп кеткен улгайган аялга кайтарып берди. Бул тууралуу казак басылмалары жазышты.

Маалыматка ылайык, 19-сентябрда алматылык Бекарыс Алимнур эки улгайган аялды үйүнө жеткирген. Кийинчерээк жигит жүргүнчүлөрдүн чоң суммадагы акчасы жана баалуу зер буюмдары бар чемоданын унутуп кетишкенин байкаган.

"1 миллион 500 миң теңге жана алтын буюмдар бар болчу. Чемодандын ээсин 11 күн издедим. Жыйынтыгында мен аны таап, бүгүн эртең менен кайтарып бердим. Менимче, мындай окуяга туш болгон ар бир нормалдуу адам муну жасаса, биздин өлкөнүн келечеги кең болот. Ата-энем дагы акчаны кайтаруу керектигин айтышты", - деген 23 жаштагы жигит.

Автор: Айзада Кыдырмышева