Легендарлуу өзбекстандык гимнаст Оксана Чусовитина спорттук карьерасын улантат

46 жаштагы көркөм гимнастика боюнча Дүйнө чемпиону Оксана Чусовитина спорттук карьерасын улантууну чечти. Бул тууралуу чет элдик маалымат каражаттары жазып чыгышты.

Маалыматка ылайык, спортчу өзүнүн социалдык тармактагы баракчасына 2022-жылы боло турган Азия оюндарына катышарын билдирген.

"Баарына айткым келет. Мен 2022-жылы боло турган Азия оюндарына даярданууну чечтим. Өзбекстан үчүн медалсыз карьерамды токтото албайм", - деген Оксана Чусовитина.

Белгилей кетсек, ал 25-июлда Токио Олимпиадасындагы ийгиликсиз мелдешинен кийин карьерасын жыйынтыктап жатканын жарыялаган.

Чусовитина 1991-жылы СССРдин курама командасынын курамында эки жолку Дүйнө чемпиону болгон. 1992-жылы Барселонада өткөн Олимпиада оюндарында дебют жасап, СССРдин атынан алтын медалга ээ болгон.
2002-жылы спортчу үй-бүлөлүк себептерден улам Германияга көчүп барып, 2006-2012-жылдары Германиянын атынан мелдештерге катышкан. 2008-жылы "Пекин" Олимпиадасында ал күмүш медалга татыган.

Эске салсак, Жайкы Азия оюндары 2022-жылдын 10-25-сентябрында Кытайдын Ханчжоу шаарында өтөт.

Автор: Каныкей Амантаева