Осло: "9:0". Сардарбек Конушбаев чейрек финалга чыкты

Кыргыз балбаны Сардарбек Конушбаев Осло шаарында өтүп жаткан күрөш боюнча Дүйнө чемпиондугунда бүгүн, 7-октябрда килемге чыкты.

Кыргыз балбаны Дүйнө чемпиондугуна 55 килограмм салмакта катышып, анда алгачкы беттешинде түштүк кореялык балбан менен кез келди.

Беттештин биринчи бөлүгүндө атаандашы активдүү болбогону үчүн кыргыз балбаны 1 упай алып, калыс түштүк кореялык балбанды партерге койду. Сардарбек Конушбаев андан 8 упай иштеп таап, 9:0 эсебинде мөөнөтүнөн мурда жеңишке жетти.

Муну менен кыргыз балбаны Дүйнө чемпиондугунун чейрек финалына чыкты. Чейрек финалда кыргыз балбаны азербайжандык Элданиз Азизли менен кез келет.

Автор: Азат Бейшенбеков