Рамзан Кадыров өзүнүн 22 жаштагы кызын Чеченстандын маданият министри кылып дайындады

Чеченстандын башчысы Рамзан Кадыровдун 22 жаштагы улуу кызы республиканын маданият министри болуп дайындалды. Бул тууралуу аталган өлкөнүн парламентинин спикери Магомед Даудов Инстаграм баракчасына жазып чыкты.

"Мен сүйүктүү жээним Айшат Рамзановнаны Чеченстандын маданият министри болуп дайындалышы менен куттуктайм! Ал жооптуу кызматында маанилүү жыйынтыктарга жетип, коюлган милдеттерди ийгиликтүү аткарат деп ишенем. Себеби ал маданият тармагын башкарууда бай тажрыйбага ээ", - деп жазган ал.

Даудов белгилегендей, Айшат өлкөнүн өнүгүшүнө, атап айтканда, китепканаларды, маданият үйлөрүн жана театрларды өнүктүрүүгө эбегейсиз салым кошкон.

Белгилей кетсек, Рамзан Кадыров кызын 2020-жылдын сентябрь айында Чеченстандын маданият министринин орун басарлыгына дайындаган. Буга чейин Айшат бир нече жылдар бою апасы негиздеген "Firdaws" мода үйүн жетектеп келген.

Автор: Айпери Бакталбек кызы