Чүйдө Hyundai Porter унаасы жөө адамды өлтүрө сүздү

Чүйдө жөө жүргүнчүнү сүзүп, окуя болгон жерден качып кеткен айдоочу кармалды. Бул тууралуу Чүй облустук жол кыймылынын коопсуздугун камсыздоо башкармалыгынан билдиришти.

Маалыматка ылайык, 24-октябрь күнү саат 20:30 чамасында Бишкек-Торугарт унаа жолунда белгисиз унаа жөө адамдар өтүүчү жолдон жаранды сүзүп, андан ары из жашырган. Кырсыктын кесепетинен 1963-жылы туулган жаран окуя болгон жерде каза болгон.

Териштирүү иштеринин натыйжасында жаранды Хундай-Портер унаасы сүзгөнү, аны Кант шаарынын 1963-жылы туулган тургуну Р.С. башкарып бара жатканы белгилүү болгон.

Окуянын чоо-жайын тактаган учурда айдоочу жөө жүргүнчүнү сүзүп алгандан кийин унаасын үйүнө жашырып койгон. Бүгүнкү күндө айдоочу кошумча иликтөө үчүн Ысык-Ата райондук ички иштер бөлүмүнө жеткирилип, унаа айып короо жайына киргизилген.

Автор: Айсалкын Качкынбекова