"Төрт iPhone, 3 миң доллар...". Бишкекте Индиянын жаранын тоногонго шектүүлөр кармалды

Бишкекте Индиянын жаранына кол салып, тоногонго шектүүлөр кармалды. Бул тууралуу Ленин райондук ички иштер башкармалыгынын басма сөз кызматынан билдиришти.

Маалыматка ылайык, жабырлануучу милицияга 19-октябрда кечки саат 20:00 чамасында Москва көчөсүндө белгисиз адамдар аны коркутуп, 3 миң АКШ долларын, 7 миң сомун, төрт iPhone телефонун, дагы үч Redmi телефонун, ноутбук, кулакчын, саат, күрмө, футболка жана бут кийимин алып кетишкендигин билдирген.

Бул факты Кылмыш-жаза кодексинин 202-беренесинин ("каракчылык") негизинде Кылмыштардын жана жоруктардын бирдиктүү реестрине катталып, сотко чейинки өндүрүш иштери башталган. Милиция кызматкерлери беш шектүүнү кармашкан. Ленин райондук соту төрт шектүүнү Бишкектеги СИЗО-1ге эки айга камакка алуу чечимин чыгарса, 17 жаштагы Н.О. ата-энесинин көзөмөлүнө өткөрүп берилген.

Учурда келтирилген чыгым эсептелип жатат.

Автор: Азат Бейшенбеков