Садыр Жапаров Түрк тилдүү мамлекеттердин кызматташтык кеңешинин башкы катчысын кабыл алды

Бүгүн, 8-ноябрда президент Садыр Жапаров Түрк тилдүү мамлекеттердин кызматташтык кеңешинин (ТМКК) башкы катчысы Багдад Амреевди кабыл алды. Бул тууралуу президенттик администрациясынын басма сөз кызматынан билдиришти.

Жолугушуунун жүрүшүндө мамлекет башчысына аталган кеңештин алдыда өтүүчү жыйынына даярдыктардын жүрүшү тууралуу маалымат берилди.

Садыр Жапаров Түрк кеңешине катышуучу өлкөлөрдүн интеграциялык процессинде жана көп тараптуу кызматташтыкты бекемдөөдөгү негизги ролун баса белгиледи. Ал Кыргыз мамлекетинин Түрк тилдүү мамлекеттердин кызматташтык кеңешине катышууга өзгөчө маани берерин белгиледи.

Президент Садыр Жапаров алдыда өтүүчү саммит, Түрк кеңешин мындан ары чыңдоо жана өнүктүрүү маселелерин талкуулоого жакшы мүмкүнчүлүк болот деген пикирин билдирди.
Багдад Амреев кезектеги жыйынга даярдыктардын жүрүшү жана талкууга алына турган күтүлүүчү маселелер тууралуу кеңири айтып берди.

Ошондой эле жолугушуунун жүрүшүндө кеңештин Инвестициялык фондун Бишкек шаарына жайгаштыруу маселелери талкууланды.

Автор: Жылдыз Джускембаева