"Игра в Кальмаранын" режиссёру сериалдын уландысын күтүп жаткандар үчүн билдирүү жасады

Түштүк кореялык "Игра в Кальмара" сериалынын режиссёру Хван Дон Хёк Лос-Анжелесте өткөн иш-чарада сериалдын экинчи сезонун чыдамсыздык менен күткөндөр үчүн билдирүү жасады. Бул тууралуу чет элдик басылмалар жазып чыгышты.

Маалыматка ылайык, режиссёр сериалдын уландысы тартыла турганын тастыктаган. Бирок азыр иш пландоо баскычында гана экенин эскерткен.

"Экинчи сезон үчүн ушунчалык көп кысым, көп суроолор болду. Демек, сиздер бизге тандоо калтырдыңыздар. Азыр экинчи сезонду ойлонуп жатам. Мен пландоо процессиндемин. Бирок качан жана кантип тартыларын айтуу эрте", - деген Хван Дон Хёк.

Режиссёр биринчи сезондун башкы каарманы Сон Ки Хундун экинчи сезонго кайтып келерин тастыктаган.

"Ки Хун кайтып келет деп убада берем. Ал дүйнө үчүн бир нерсе кылат", - деп кошумчалаган ал.

"Игра в Кальмара" сериалы сентябрь айында гана чыкканына карабастан бүткүл дүйнөдө атактуулукка жетти.

Маалымат үчүн: "Игра в кальмара" 9 бөлүмдөн турган сериал, анда карызга баткан карапайым адамдардын чоң суммадагы акча коюлуп байлар тарабынан уюштурулган оюнга катышканы, ал оюн жеңилген адамдардын өлүмү менен коштолуп отуруп, акырында 1 гана адамдын аман калганы баяндалат.

Автор: Азат Бейшенбеков