Бишкекте Ооганстандын жаранына таандык унааны белгисиз адамдар уурдап кетишкен. Шектүү 20 жашта

Борбор калаанын милициясынын ыкчам кызматкерлери унаа уурдоого шектүүнү кармашты. Бул тууралуу Свердлов РИИБинин басма сөз кызматы билдирди.

Маалыматка ылайык, райондук милицияга Ооганстан Республикасынын жараны М.М. арыз менен кайрылып, 15-ноябрь күнү болжол менен саат 18:00дөн 08:30га чейинки убакта унаа токтотуучу жайдан Хонда-Одиссей үлгүсүндөгү унаасын мыйзамсыз ээлеп алган белгисиз адамдарга карата чара көрүү өтүнүчү менен кайрылган.

Бул факты Свердлов РИИБинде каттоого алынып, сотко чейинки өндүрүш иштери башталган.

"Иликтөө, издөө иш-чараларынын жүрүшүндө кылмышка шектүү катары 2001-жылы туулган З.А. аттуу жаран кармалган. Ал тергөө кызматына жеткирилип, убактылуу кармоочу жайга киргизилген.

Учурда шектүүнүн башка кылмыш иштерине катыштыгы бар экендигин аныктоо боюнча зарыл болгон тергөө амалдары жана ыкчам иш-чаралары жүргүзүлүүдө.

Ошондой эле кылмышка шектүүнүн кылмыштуу аракеттеринен жапа чеккен жана кандайдыр бир маалыматы бар жарандар 0 550 102-609, 0 708 40-55-80 жана 102 телефондоруна кайрылыңыздар", - деп жазылат маалыматта.

Автор: Алина Айдарбекова