Күч колдонуп телефонун жана акчасын тартып алган. Мурда соттолгон жаран каракчылыкка шектелүүдө

Бишкек шаарында каракчылыкка шектүү жаран Биринчи Май РИИБинин кызматкерлери тарабынан колго түшүрүлдү. Бул тууралуу шаардык ички иштер башкы башкармалыгынан кабарлашты.

Маалым болгондой, 17-ноябрда шаар тургуну карактап кеткен жарандага карата чара көрүү өтүнүчү менен кайрылган. Анда 17-ноябрга караган түнү саат 03:40 чамасында Алтын-Казык конушунан белгисиз жарандар физикалык күч колдонуп, коркутуу жолу менен 20 миң сомдук телефонун жана 4 миң сомун тартып алганы айтылган.

Бул факты Кылмыштардын жана жоруктардын бирдиктүү реестрине 202-берене ("карактоо") менен катталып, сотко чейинки өндүрүш иши ачылды.

"Тергөө иштеринин жүрүшүндө шектүү катары 1992-жылы туулган Д.М. кармалып, убактылуу кармоочу жайга киргизилди. Кармалган жаран уюшкан кылмыштуу топтун мүчөсү катары каттоодо турган, мурда соттолгон. Учурда шектүүнүн мындан башка кылмыш иштерине катыштыгын аныктоо амалдары улантылып жатат", - дешти мекемеден.

Автор: Бактыгүл Момбекова
Фото: Бишкек ШИИББи