Ошто 2 бала балдар үйүнө, дагы 24 өспүрүм социалдык мекемелерге өткөрүлдү

Ош шаарында "Камкордук" аталышындагы рейддин жүрүшүндө 2 бала балдар үйүнө өткөрүлсө, оор шартта жашаган 24 бала социалдык мекемелерге берилди. Бул туурасында Ош ШИИБинин маалымат кызыматынан кабарлашты.

"Иш-чаранын жүрүшүндө жылуулук трассалары, жер төлөлөр, интернет клубдар, коомдук тамактануучу жайлар, соода түйүндөрү текшерилди. Натыйжада балдар үйүнө 2 бала жеткирилди, оор шарттарда жашаган 24 өспүрүмгө жардам көрсөтүү боюнча социалдык мекемелерге билдирилди. Мектепке барбай жаткан 9 окуучунун ата-энелери менен маектешүүлөр жүргүзүлүп мектепке кайтарылды. Базарларда, соода түйүндөрүндө иштеп жүрүшкөн 17 өспүрүм аныкталды. Бул иш-чаранын жүрүшүндө аныкталган фактыларга таянып, өспүрүмдөргө жардам көрсөтүү максатында жергиликтүү бийлик органдарына 19, билим берүү тармагына 7, социалдык коргоо органдарына 22 кат жөнөтүлдү", - дешти мекемеден.

Рейддин жүрүшүндө аныкталган оор шарттарда жашаган, жумушка тартылган балдардын көпчүлүгү ички жана сырткы миграция менен келип, отурукташа баштаган жарандардын балдары экендиги аныкталды. Иш-чаранын негизги максаты жашы жетпей туруп оор шарттарда иштеген, оор турмуштук кырдаалга туш болгон балдарды, мектеп курагындагы кайыр сураган өспүрүмдөрдү аныктоо, аларга жардам көрсөтүү болуп саналат.

Автор: Бактыгүл Момбекова
Фото: Ош ШИИБи