Баасы 100 миң долларды чапчыйт. Коргоо министрлигине АКШнын элчилиги рентген жабдыктарын тапшырды

Кыргыз өлкөсүнүн Коргоо министрлигине АКШнын элчилиги тарабынан жалпы баасы 100 миң доллардан ашкан каражатка рентген аппараты тапшырылды. Элчиликтин маалыматы боюнча, бул жабдуулар Коргоо министрлигинин медициналык бөлүмүнө тынчтык орнотуу операцияларын жүргүзүүгө жардам берет.

Салтанатка АКШнын Кыргыз жергесиндеги ишенимдүү өкүлү Соната Коултер, Кыргыз Республикасынын коргоо министринин орун басары полковник Акылбек Ибраев жана башка аскерий жетекчилер катышты. Коултер бул жабдыктарды жеткирүү АКШ менен Кыргыз өлкөсүнүн ортосундагы 30 жылдык кызматташууга өбөлгө түзөрүн белгиледи.

"Биз 2017-жылдан бери биринчи жолу Кыргыз мамлекетинин Коргоо министрлигине жабдыктардын жеткирилишин белгилеп жатабыз. Бул иш-чара кезектеги тыгыз өнөктөштүктү жана чек ара коопсуздугу, терроризмге каршы күрөшүү сыяктуу маанилүү артыкчылыктар боюнча биргелешип иштөөнү билдирет деп ишенебиз", - деди элчи.

Өз кезегинде Акылбек Ибраев АКШга берилген техника үчүн ыраазычылык билдирип, Бириккен улуттар уюмунун тынчтык орнотуу операциялары учурунда Кыргыз өлкөсүнүн Куралдуу күчтөрүнүн медициналык мүмкүнчүлүктөрүн жакшыртарына ишеним билдирди. Маалыматка ылайык, жабдуулар АКШнын глобалдык тынчтык демилгеси программасынын алкагында берилген.

Автор: Бактыгүл Момбекова
Фото: Коргоо министирлиги