Акылбек Жапаров ИИМге келип шайлоо процесси учурунда коомдук тартиптин сакталышына көңүл бурду

Министрлер кабинетинин төрагасы Акылбек Жапаров ИИМге келип шайлоо процесси учурунда коомдук тартиптин сакталышына көңүл бурду. Бул тууралуу ИИМдин басма сөз кызматынан билдиришти.

Бүгүн, 28-ноябрда министрлер кабинетинин төрагасы Акылбек Жапаров ИИМге келип шайлоо процесси учурундагы ички иштер органдарынын ишмердүүлүгүн байкоого алды. Акылбек Жапаров ыкчам кырдаалдарга байкоо жүргүзүү жана ага жараша чечимдерди кабыл алуу кырдаалдык борбордун приоритеттүү багыттары жана министрликтин басма сөз кызматынын ишмердүүлүгү менен таанышты.

Ички иштер министри Улан Ниязбеков Акылбек Жапаровго шайлоо өнөктүгүнө байланыштуу коомдук тартипти сактоо багытында көрүлүп жаткан коомдук-саясий жана криминалдык абалдын милиция тарабынан толук көзөмөлгө алынып жаткандыгын баса белгилеп жана ушул багытта жүргүзүлүп жаткан иш-чаралардын комплекстүү багыттары менен тааныштырды.

Иш-чаранын жүрүшүндө Акылбек Жапаров ИИМдин кырдаалдык борборунун мүмкүнчүлүктөрүнүн негизинде түз байланышка чыгуу менен борборубузда жана региондордо шайлоо өнөктүгү кандай жүрүп жаткандыгын байкоого алып, облустардагы мамлекеттик администрациялардын шайлоо боюнча ишмердигине да көз салып, шайлоо процесси учурунда шайлоону эркин, таза жана ачык-айкын уюштурууну, ошондой эле административдик ресурсту пайдаланууга бөгөт коюу жана шайлоону өткөрүү үчүн шарттарды камсыздоо негизги тапшырмалардын бири экенин баса белгиледи.

Автор: Айсалкын Качкынбекова