Футбол: "ПСЖ" клубунун оюнчусу Неймар бутунан катуу жаракат алды

"ПСЖ" футболдук клубунун чабуулчусу Неймар футбол боюнча Франция чемпиондугундагы "Сент-Этьен" клубуна каршы оюнда бутунан оор жаракат алды.

Оюн жекшемби күнү болуп, 3:1 эсебинде париждиктердин жеңиши менен аяктады. Оюндун 84-мүнөтүндө "Сент-Этьендин" оюнчусу Иван Мэйсон Неймардын бутуна оор жаракат келтирди. Футболчу талаада бир нече мүнөт жатып, тура албаган соң медицина кызматкерлери алып кетишти.

Оюндан кийин "ПСЖ" клубунун башкы машыктыруучусу Маурисио Почеттино Неймар дүйшөмбү күнү медициналык кароодон өтөрүн, андан кийин анын жаракатынын оордугу жана айыгуу убактысы белгилүү болорун билдирген.

Автор: Азат Бейшенбеков