Өзгөндө жөө адамды өлтүрө сүзүп из жашырган айдоочу Бишкекке качып бара жаткан жеринен кармалды

Ош облусунун Өзгөн районунда жөө адамды өлтүрө сүзүп из жашырган айдоочу Бишкекке качып бара жаткан жеринен кармалды. Бул тууралуу облустук жол кыймылынын коопсуздугун камсыздоо бөлүмүнөн билдиришти.

Маалыматка ылайык, 30-ноябрь күнү саат 22:30 чамасында Өзгөн-Мырза-Аке жолунун 4-чакырымында аталган райондун тургунун белгисиз айдоочу сүзүп, окуя болгон жерден из жашырып кеткен.

Кырсыктан улам жабырлануучу 1968-жылы туулган Ч.А. окуя болгон жерден каза болгон. Жүргүзүлгөн ыкчам-иликтөө иштеринин натыйжасында качып кеткен айдоочу Өзгөн районунун 1986-жылы туулган Т.Ж. аттуу айдоочу Мерседес-Бенц унаасы менен Бишкек шаарына качып бара жаткан жеринен жол кыймылынын кызматкерлери тарабынан кармалган.

Айдоочу Өзгөн РИИБине жеткирилип, унаасы айып короого токтотулуп, тийиштүү экспертизалар дайындалып, азыркы учурда тергөө иштери жүргүзүлүүдө.

Автор: Айсалкын Качкынбекова