Куйкум сөздүү курч акын, калемпир тилдүү мурч акын Аалы Туткучев 38 жашка толду

Атагы кыргыз, казакка жайылган, куйкум сөздүү курч акын, калемпир тилдүү мурч акын, бетке айтып ырдаган, баарын сындаган ак таңдай акын Аалы Туткучев бүгүн, 9-декабрда 38 жашка толду.

Төкмө акын 1983-жылы Талас облусундагы Манас районунун Арал айылында туулган. 2005-жылы Бүбүсара Бейшеналиева атындагы Кыргыз мамлекеттик искусство институтун бүтүргөн.

2002-жылы кыргыз маданиятынын бир бөлүгү болгон акындардын төкмөчүлүк өнөрүн жандандыруу максатында түзүлгөн "Айтыш" коомдук фондунда кыргыз элинин чыгаан төкмө акындары Ашыраалы Айталиев, Тууганбай Абдиевден сабак алып, азыркы муундун төкмө акындык өнөрүн улап келүүдө. Кыргыз өлкөсүндө өткөн көптөгөн кыргыз акындар айтышында жеңишке жеткен.

Ал айтыш өнөрү менен гана чектелип калбастан эстрада жанрында "Байтору" деген ыр жазган. Анда күлүк аттар тууралуу ырдалып, алардын асылдыгы даңкталган. Акындын "Булгаба ичкен кудукту, "Ак-кайың" деген термелери да бар.

Учурда Аалы Туткучев Токтогул Сатылганов атындагы Кыргыз улуттук филармониясынын
"Эл ырчысы Эстебес" фольклордук тобунун жетекчиси. 31-августта президент Садыр Жапаровдун жарлыгына ылайык, Кыргыз Республикасынын Эл акыны наамы ыйгарылды.