Күрөш тарыхындагы супер тиреш: Абдулрашид Садулаев Кайл Снайдерди өз үйүндө коноктоду (видео)

"Токио-2020" жайкы Олимпиада оюндарынын чемпиону Абдулрашид Садулаев өзүнүн салмагындагы дагы бир мыкты делген америкалык балбан Кайл Снайдерди өз өлкөсүнө чакырып, үйүндө коноктоду.

Абдулрашид Садулаев Кайл Снайдерди алгач Москва шаарынан тосуп алып, андан кийин Дагестанга алып барган. Ал балбанды өзү төрөлүп чоңойгон Дагестандын Чародин районунун Гилиб айылындагы үйүнө алып барып коноктогон.

Садулаев-Снайдер бул күрөш тарыхындагы супер тирешүү. Бири-бирине бардык жагынан төп келген бул эки балбан ар дайым дүйнөлүк турнирлердин финалында кез келет.

Биринчи жолу эки балбан 2017-жылы Парижде өткөн Дүйнө чемпиондугунун финалында кез келген. Анда америкалык балбан Садулаевди 6:5 эсеби менен утуп алган. Бир жылдан кийин, тагыраагы, 2018-жылы Будапешт шаарында өткөн Дүйнө чемпиондугунда эки балбан кайрадан финалда кез келип, Садулаев атаандашынын далысын жерге таза басып жеңишке жеткен.

Быйыл Токио шаарында өткөн жайкы Олимпиада оюндарынын финалында дагы эки балбан кез келип, анда дагы Садулаев жеңишке жеткен. Осло шаарында өткөн Дүйнө чемпиондугунун финалында дагы экөө кез келип, 6:0 эсебинде Садулаев жеңишке жетти.