"Жардам көрсөтпөй качып кеткен". Чүйдө жөө жүргүнчүнү сүзүп кеткен айдоочу 2 айдан кийин кармалды, жабырлануучу каза болгон

Чүй облусунун Аламүдүн айылында 25 жаштагы жөө адамды сүзүп, окуя болгон жерден качып кеткен айдоочу табылды. Бул туурасында облустук жол кыймылынын коопсуздугун камсыздоо башкармалыгынан бүгүн, 10-декабрда маалымдашты.

Окуя ушул жылдын, 31-октябрында таңкы саат 05:30 чамасында орун алган. Анда Чекиш-Ата базарынын жанында айдоочу жөө адамды сүзүп, жардам көрсөтпөй качып кеткен. Анын кесепетинен 25 жаштагы жабырлануучу ооруканага жеткирилип, алган жаракаттарынан улам 22-ноябрда каза болгон.

"Бул факты боюнча инспекторлор 1-ноябрдан 9-декабрга чейин издөө иш-чараларын жүргүзүп, айдоочуну аныкташты. Ал 1986-жылы туулган М.Р. аттуу Токмок шаарынын тургуну экени белгилүү болду. Ал эми айдоочунун унаасы Бишкектеги малярдык станциялардын биринен табылды. Учурда тергөө амалдары улантылууда", - деп билдиришти маалымат кызматынан.

Автор: Бактыгүл Момбекова
Фото: Чүй облустук Жол кыймылынын коопсуздугун камсыздоо башкармалыгы