Валентина Шевченко Ошто: Мушкер айым милиция кызматкерлерине мастер-класс өттү (фото)

Бүгүн, 14-декабрда UFC уюмунун чемпиону Валентина Шевченко Ош облустук ички иштер башкармалыгына барды. Бул тууралуу облустук милиция кабарлады.

Билдирүүгө ылайык, мушкер айымды Ош ОИИБинин саптык аянтчасында туу көтөрүү менен өздүк курам салтанаттуу тосуп алган. Аталган аземдин жүрүшүндө Кыргыз Республикасынын гимни аткарылып, андан соң Ош ОИИБинин начальниги милициянын полковниги Жеңишбек Абитов сөз сүйлөп, белектерди тапшырган.

"Өз сөзүндө Валентина Шевченко милиция кызматкерлери менен жолукканына кубанып, салтанаттуу тосуп алгандыгына ыраазычылыгын билдирип кетти. Ошондой эле спортчуга арналган салтанаттуу азем саптык жүрүш менен аяктады", - деп билдирди облустук милиция.

Андан соң башкармалыктын спорт залында дүйнө чемпиону өздүк курамга мастер-класс көрсөткөн.

Ошондой эле Валентина Шевченко башкармалыктын имаратында жайгашкан милициянын генерал-майору Базарбай Нурматов атындагы тарых музейдин материалдары менен таанышып музейге киргендер үчүн кол тамгасын калтыруу журналына каалоо-тилектерин жазган.

Автор: Азат Бейшенбеков
Фото: Ош ОИИБ